Ginatilan nakatala og daghang kaso

Cebu, Philippines — Masulob-on nga gipahibalo ni Mayor Dean Michael Singco sa Lungsod sa Ginatilan sa iyang social media page nga aduna silay 13 ka mga positibo sa Covid-19 cases. Ang 12 niini mga Person Deprive of Liberty ug usa niini first responder sa munisipyo.

Nagpadayon pa karon ang ilang contact tracing sa Rural Health Unit ug kadtong mga direktang nakauban o primary contacts sa mga nagpositibo ipaubos sab sa swab ug quarantine,

Ang lungsod sa Ginatilan adunay 22 ka active case ug giingong maoy pinakadaghan og kaso sa habagatang bahin sa probinsya sa Sugbo.

Gihangyo sa mayor ang publiko nga dili gyud mokumpiyansa karong panahona ug kinahanglan nilang mosunod sa mga gipatuman nga health protocols.

Gidasig sab niya ang katawhan nga usahon ang ilang mga lakaw ug likayan ang mga tapok-tapok ilabi na kun dili mga importante ang tuyo. (BANAT NEWS)