Road clearing gipadayon sa Consolacion

Cebu, Philippines — Padayon nga gipatuman sa Lungsod sa Consolacion ang road clearing human sila nakadawat sa memo ug communication gikan sa buhatan sa Department of Interior and Local Government DILG.

Matud ni Mayor Joannes ‘Joyjoy’ Alegado nga wala sila mohunong sa pagpahigayon og road clearing, apan tungod sa covid-19 pandemic, ilang namatikdan nga nakalimtan sa katawhan ang pagtuman sa maong kamanduan sa gobyerno.

Dugang pa ni Alegado, adunay laing hugna sa evaluation sa road clearing nga mahitabo sa katapusan nga semana sa Enero ug unang semana sa Pebrero, gani gipahibalo na niya ang iyang mga kapitan sa maong kalihukan ug nakigtagbo na usab siya sa iyang road clearing taskforce.

Gipadad-an na usab ug notisya ang mga hingtungdan nga nakalapas sa gilatid nga lagda samtang padayon usab ang towing sa mga sakyanan nga magpataka og parking sa kadanan.

Ang mayor, nitug-an nga ang ilang kapolisan ug mga sakop sa engineering padayon nga naglibot sa lungsod aron moguba sa mga illegal structures.

Subay niini gihangyo kadtong mga nanag-iya og estraktura nga nakababag sa karsada nga boluntaryo na lang nga moguba sa ilang edipisyo ug dili na magpaabot sa gobyerno nga maoy moguba niini. (BANAT NEWS)