Tricycle terminal ilakip sa clearing operation sa siyudad sa Sugbo

CEBU, Philippines — Target karon sa kagamhanan sa Siyudad sa Sugbo nga i-apil sa clearing operation ang mga tricycle terminal sa nagkadaiyang barangay.

Nasayran nga dunay ubang terminal nga walay saktong lugar nga parkingan sa mga tricycle busa nakababag gyud kini sa kalsada.

Matud pa ni Konsehal Philip Zafra nga motabang ang siyudad sa pagpangita og lugar nga kabalhinan sa tricycle terminal nga dili makabalda sa agianan ug makigtagbo usab siya sa mga tricycle drivers.

“Ang resulta niana, nakahuot na hinuon sila sa kalsada. Mao na karon ang gipangitaan nato og pamaagi nga masulbad na ang maong problema,” suma pa ni Zafra.

Ang mga barangay nga dunay tricycle terminal mao ang Labangon, Pasil, Capitol Site, Labangon, Quiot Pardo,Tisa, ug Lahug.

Nasayran ang lapad nga pagpatuman sa clearing operation sa kadalanan usa ka nasudnong mando sa Department of Interior and Local Government (DILG).

Samtang nakasinati ug kalisdanan ang Dakbayan sa Carcar sa pagpatuman sa kamanduan sa DILG kabahin sa road clearing.

Kini human namatikdan nga duna gihapoy mga straktura ug manindahay nga naa sa sidewalk sa maong siyudad.

Apan Matud pa ni Vice Mayor Nicepuro Apura, ilaha nang gipadalhan ug notisya ang mga hingtungdan aron sila na mismo ang moguba o mosibog sa ilang mga estraktura.

Gitug-an usab ni Vice mayor Apura nga mopalit sila og ekipo alang sa pagpahigayon nila ug towing sa mga sakyanan nga magpataka lang ug parking daplin sa dalan.

Samtang gitugtan usab ang mga tricycle nga makapamasahero sa highway tungod kay adunay mga lugar nga walay alternatibo nga dalan. —Rowena D. Capistrano /MEL (BANATNEWS)