Casas: Labella nag-sick leave tungod sa ear infection

CEBU, Philippines — Gikompirmar ni Cebu City Administrator Floro Casas Jr. nga nag-sick leave si Mayor Edgardo Labella gumikan sa ear infection.

Apan gihimakak ni Casas ang mga hunghongihong nga giingong na-coma ang mayor.

Nagkanayon si Casas nga sugod kagahapon ang sick leave ni Labella ug walay angayang kabalak-an sa kondisyon sa mayor.

Si Bise Mayor Michael Rama maoy acting mayor karon ug nakigtigom kini kagahapon sa mga department head.

Nagkanayon si Rama nga wala siya mahimuot sa nagpakatap sa nahisgutang taho diin fake news kini ug dili angayang tuohan.

“I was telling him nga pa-interview ka para madunggan na imong tingog nga wa ka ma-coma, buhi ka”, ni Rama pa.

Gibutyag ni Rama nga nag-estoryahanay sila ni Labella sa telepono dili pa lang dugay ug kasamtangan kini nga na-confine diha sa usa ka pribadong tambalanan aron masiguro nga mahatagan kini og tukmang pag-atiman.

Gipasalig ni Rama ang maayong pagdumala sa siyudad samtang siya ang nagsilbing acting mayor.

Nasayran nga wala katambong si Labella sa opening ceremony sa Virtual Sinulog Grand Rewind niadtong Domingo diha sa Fort San Pedro hinungdan si Rama maoy nipuli sa pagpadangat og opening speech sa maong kalihokan.

Giingong mao na kadtong higayona nga nagmulo na si Labella sa iyang ear infection.

Samtang kagahapon sa hapon niisyu dayon og statement si Labella pinaagi sa iyang facebook account diin gipahibalo niya nga gitambagan siya sa doktor nga mopahuway og tulo ka adlaw ug si Rama na ang kasamtangang mohupot sa buhatunon sa executive. –BDB (BANATNEWS)