LTO: Dili duwaan ang transcentral highway
CEBU, Philippines — Nanawagan si Land Transportation Office 7 Regional Director Victor Caidec, sa mga motorista nga moagi sa trans central highway TCH nga mag matngon sa ilang pagmaneho ug dili himoong playground ang maong karsada.
Kini giluwatan ni Caindec human siya mismo ang misita og mga bata pa nga nagmaneho ug motor nga matud pa gisugo sa inahan paghatud og module.
Suma pa ni Caindec nga bisan kada adlaw pa sila manakop ug ang mga biyahedor dili makasabot nga dili duwaanan ang TCH dili gayud moundang ang disgrasya.
Samtang laing aksidente ang nahitabo niadtong Domingo ug Lunes sa buntag base sa talaan sa Balamban Police Station duha ang nakalas sa managlahi nga disgrasya sulod lang sa 24 oras. Unang disgrasya nahitabo sa may Barangay Cansomoroy, diin usa ka Philip Manuel Ticar, 24anyos, taga Barangay Lawaan Talisay City ang nakalas human kini nibangga sa gimaneho ni RJ Mhatt Madrediños.
Nawad-an ug control sa iyang pagmaneho si Ticar nga maoy hinungdan nibangga kini sa pikas lane sa gimaneho ni Madrediños ug nakaangkon ug grabe nga kadaut sa dihang nabunal ang ulo niini sa semento.
Dali pa unta nga gidala sa tambalanan si Ticar, apan gideklarar kini nga dead on arrival.
Ikaduhang disgrasya nahitabo Lunes sa kadlawon sa may Sitio Bung-ao, Barangay Pundol, diin usa ka Julius Jay Cogo, ang nakalas human nibangga sa usa ka Mitsubishi truck nga gimaneho ni Felix Baron, 38anyos, minyo, taga Matab-ang Toledo City.
Ang biktima nakabsan gihapon sa iyang kinabuhi tungod sa grabeng kadaut nga naangkon niini. —MEL (BANATNEWS)
- Latest
