Garganera: Walay lockdown; APOR dili exempted sa curfew
CEBU, Philippines — Gipasalig sa mga kadagkoan sa lokal nga kagamhanan sa Dakbayan sa Sugbo ngadto sa publiko nga walay ipatuman nga lockdown bisan sa padayon nga pagsaka sa kaso sa COVID-19 karong panahona.
Kini ang gibutyag ni Konsehal Joel Garganera, deputy chief implementer sa Emergency Operation Center atol sa gipahigayong press conference kagahapon sa buntag. Nasayran nga daghang Sugboanon ang nabalaka kabahin sa maong hunghongihong.
Matud ni Garganera nga walay lockdown nga mahitabo ug pabilin sa modified general community quarantine ang siyudad.
Lakip sa nitambong sa press conference si Retired Major General Mel Feliciano, deputy chief implementer sa Inter-Agency Task Force for the Management of Emerging Infectious Disease Visayas kinsa nibutyag nga ang pagsaka sa kaso sa COVID-19 sa Dakbayan sa Sugbo sa pagkakaron dili pa kini angayng kabalak-an.
Matud ni Feliciano nga ang EOC dili na makatugot sa usa ka istrikto nga quarantine protocol hinungdan nga padayon ang ilang gihimong aksiyon batok sa COVID-19.
Ang Dakbayan sa Sugbo nagpadayon sa ilang double digit number nga bag-ong kaso sa COVID-19 sukad sa pagsugod sa buwan sa Enero 2021.
Ang pagsaka sa gidaghanon sa kaso sa COVID-19 tungod kini sa daghang gatherings ug lingaw-lingaw niadtong buwan sa Disyembre 2020.
Ang EOC nipasalig sa publiko nga ilaha nang gipangandaman ug nalantawan ang pagsaka sa kaso. Sa laing bahin, giklaro ni Garganera nga dili exempted ang authorized persons outside of residence (APOR) sa gipatuman nga quarantine protocols2 Giawhag niya ang mga APOR nga bisan panahon sa curfew kinahanglang motuman ilabi na kon dili nila oras nga tingtrabaho.
Matud ni Garganera nga importante kaayo ang kooperasyon sa publiko ilabi na karon nga nagkasaka napud og balik ang kaso sa COVID-19.
Sayo pa, nag-trending ang report sa niaging semana human 12 ka doktor ang nasikop sa operatiba sa Cebu City Police Office atol sa Oplan Bulabog. Giingong ang maong mga doktor nakalapas kini sa curfew diin nadakpan sila diha sa usa ka resto bar sa Barangay Banilad.
Sayo pa, ang kapolisan niklaro usab nga bisan mga APOR wala magpasabot nga mahimo kining makalakaw-lakaw, mag-inom-inom o motambong og mga kalingawan diha sa publikong lugar panahon sa curfew.
Samtang niabot ngadto sa 14 ka establisamento ang gipangayoan og eksplinasyon sa siyudad human sa report nga giingong wala sila mopatuman og quarantine protocols.
Si Dr. Michelle Linsalata, OIC assistant Hhalth officer sa Cebu City Health Department nagkanayon nga sakop sa emergency operations center nga ang 12 ka doktor nga nasikop.
Matud ni Linsalata nagpaabot sila sa report gikan sa Philippine National Police ug Prevention Restoration Order Beautification Enhancement (PROBE) aron ilaha kining ma-submit ngadto sa Cebu Medical Society aron usab matun-an ang lakang nga buhaton batok sa maong mga doktor. —Decemay P. Padilla, Sanden J. Anadia/BDB (BANATNEWS)
- Latest