CEBU, Philippines — Ang Lungsod sa Samboan nibalik kini og pag-istrikto sa ilang guidelines alang sa mga mamauli nga indibidwal ug mga bisita sugod karong adlawa hangtud sa Enero 31, 2021.
Kini gumikan sa pagtaas sa mga kaso sa COVID-19 sa Metro Cebu ug uban pang mga lungsod sa Probinsiya sa Sugbo.
Ang mga opisyal sa lungsod uban sa Rural Health Unit (RHU) nagpahibalo niini human sa pagkadiskubre sa mga bag-ong kaso nga natala sa ilang lungsod.
Ang quarantine sa balay temporaryo nga gisuspende diin nagpasabot kini nga ang mga locally stranded individuals (LSIs) ug mga bisita mopailawom kini sa 14 ka adlaw nga quarantine diha sa quarantine facility sa lungsod sa ilang pag-abot.
Bisan pa ang mga authorized personnel outside of residence (APOR) gitugotan nga makapauli apan kinahanglan sila nga magpuyo sa balay hangtud nga sila mobalik sa trabaho apan ang senemana nga pagpauli sa balay gi-discourage.
Ang mga dili residente sa lugar labing maayo nga dili lang una kini mobisita sa ilang mga paryente o kahigalaan nga mga residente sa lungsod.
Aron masiguro nga ang guidelines sa local government unit (LGU) mapatuman, ibalik pagbutang ang mga checkpoint diha sa utlanan.
Nasayran nga walay saulog sa pista alang sa mga Barangay sa San Sebastian, Tangbo, Bonbon, Cambigong, ug uban pang mga lugar sa lungsod kini kalabotan sa pagpatuman sa health measures.
Ang panagtigom gilimitahan usab sa 20 ka tawo matag panimalay aron maobserbahan ang social distancing.
Istrikto usab nga ipatuman ang pagsul-ob sa face mask ug face shield diha sa mga publiko nga lugar, pagdili sa tapok-tapok ug pagpatuman sa curfew.
Niadtong Enero 14, 2021, ang lungsod adunay natala nga duha ka bag-ong kaso gikan sa Barangay San Sebastian diin usa kanila ang niadto sa tertiary hospital sa Cebu City niadtong Enero 10, 2021 aron magpakonsulta tungod sa hilanat ug ubo samtang ang laing usa aduna kini contact sa unang pasyente.
Laing tulo ka kaso ang natala sa lungsod niadtong Enero 15, 2021 kinsa usa niini LSI gikan sa Tacloban samtang ang duha adunay contact sa nahisgutang pasyente. —BDB (BANATNEWS)