CEBU, Philippines — Gipasidan-an ni Mayor Edgardo Labella ang mga nagdumala og mga establisamento nga motuman sa gilatid nga quarantine protocols aron dili kini mabawian og business permit.
Mensahe ni Labella ngadto sa tag-iya sa maong mga establisamento nga “be a hero” ngadto sa katawhan aron malikay kini sa COVID-19. Samtang ang pangulo sa Business Permits and Licensing Office (BPLO) Atty. Jared Limquiaco nipahibalo nga 14 na ka establisamento ang gipadalhan na nila og show cause order.
Hatagan nila kini og pila ka adlaw nga motubag aron pagdepensa sa reklamo nga ilang giatubang ilabi na sa paglapas sa quarantine protocols.
Matud ni Limquiaco nga pipila niini kay wala gyud nipatumam og social distancing ngadto sa ilang mga kustomer.
Ang uban usab nakalapas sa executive order sa mayor nga kinahanglan nga duha ra gyud ka botilya sa alcoholic drinks ang i-serve matag kustomer.
Samtang ang pangulo sa Emergency Operations Center (EOC) Konsehal
Joel Garganera nga aduna silay pagahimuon nga mga surpresang operasyon busa panawagan niya sa store owners nga motuman gyud kini sa kamandoan sa siyudad.
Matud ni Garganera nga ang inom-inom maoy kini hinungdan sa panagtapok ug delikado kini sa transmisyon sa COVID-19.
Nasayran nga lapad usab nga operasyon ang gibuhat sa kapolisan sa pagsusi sa gipatuman nga health protocols sa mga establisamento.
Ang maong operasyon gitawag og “Oplan Bulabog”, ug ubay-ubay na usab ang nadakpan niini ilabi na sa mga indibidwal nga nanglaag panahon sa curfew hours ug sa mga nag-inom diha sa pampublikong lugar.
Sa laing bahin, gipahibalo ni Konsehal Phillip Zafra nga nagpabiling hanap ang posibilidad nga makabalik karong panahona ang operasyon sa mga sinehan sa Dakbayan sa Sugbo gumikan sa nagpadayong hulga sa COVID-19.
Si Zafra maoy usa sa mga naghupot sa task force kinsa maoy nagtuon niini ug gitahasan nga mohimo og guidelines kong maka-operate na og balik ang mga sinehan.
Nagkanayon si Zafra nga nagkataas pa ang kaso sa COVID-19 hinungdan nga dili pa angayan ang operasyon sa mga sinehan.
Gibutayag ni Zafra nga aduna siya’y laing panagtigom kauban ang Cinema operators sa sunod semana. —BDB (BANATNEWS)