CEBU, Philippines — Wala mopatim-aw si Cebu City Mayor Edgardo Labella sa opening ceremony sa virtual Sinulog 2021 kagahapon sa Fort San Pedro.
Kini ang hinungdan nga nagbaha ang mensahe sa mga netizens ug nangutana kun asa na ang mayor.
Naandan na matag tuig nga ang mayor gyud ang mohatag og mensahe sa pagbukas sa tinuig nga kalihukan.
Apan sa pagpakighinabi ni Labella sa mga tigbalita kagahapon, gitataw sa mayor nga duna siya’y ubang importanteng butang nga giatiman ug usa na niini ang iyang regular check-up.
Gitataw hinuon niya nga nagpabiling abtik ang iyang panglawas.
Kahinumduman nga sa niaging tuig, duna siya’y mga kritiko nga kanunay nga mangintriga sa kahimtang sa iyang panglawas.
Sumala pa sa mayor nga normal lang gyud nga magpaubos siya sa og regular check-up sanglit nag-agi siya og operasyon sa gallbladder sa niaging tuig.
Sa laing bahin, mapasalamaton ang mayor sa publiko nga nihatag gyud og kooperasyon aron magpabiling malinawon ang siyudad bisan pa man nga giwagtang ang physical activities sa Sinulog.
Gipasalamatan usab niya ang kaparian sa Basilica Minore del Sto. Niño gumikan sa han-ay nga pagdumala niini sa mga relihiyusong kalihukan ingon man usab ang pagkanselar sa public mass.
Kahinumduman nga gipadayon ang novena mass apan gipaagi nalang og live streaming.
Suma pa sa mayor nga sa maong sitwasyon, nag-ampo ang deboto sa tagsa-tagsa nila ka panimalay ug layo kini sa hulga sa COVID-9.
Dugang pa niya nga bisan sa pandemya nga gisagubang sa mga Sugbuanon, wala gyud natandog ang lig-ong debosyon niini ngadto sa Balaang Bata.
Samtang sa Sinulog virtual show kagahapon, gipakita ang file videos sa mga mananaug sa Sinulog sukad niadtong 1982.
Gipakita usab ang Sinulog performance ni Gobernador Gwendolyn Garcia kinsa makadaghan na nga higayon nga nihalad og sayaw sa nilabay nga mga Sinulog. —GMR (BANATNEWS)