Cebu City nakatala og labing daghang kaso sa COVID-19

Cebu, Philippines — Niadtong Biyernes natala sa Dakbayan sa Sugbo ang labing taas nga ihap sa bag-ong kaso sa Covid-19 nga niabot og 61.

Kini base sa datos sa Department of Health 7 diin nalabwan niini ang 59 ka kaso niadtong Nobiyembre 14, 2020.

Ang Dakbayan sa Sugbo aduna nay 11,333 ka kinatibuk-ang kaso Covid-19 diin niabot na sab sa 552 ang active cases.

Ang recoveries anaa sa 10,082 ug 699 ang tanan namatay.

Base sa datos sa DOH-7, ang Dakbayan sa Mandaue nakatala og walo ka bag-ong kaso ug sa kinatibuk-an adunay nay 2,791 ka kaso ang dakbayan diin 100 niini ang ilang active cases.

Ang recoveries anaa sa 2,519 human nakatala og dugang usa nga naayo samtang 172 ang namatay.

Naglakip sa mga natala nga ulahing bag-ong kaso sa Covid-19 sa Dakbayan sa Mandaue mao ang tagsa ka bag-ong kaso sa Barangay Canduman, Jagobiao, Labogon, Pagsabungan, Centro, Bakilid, Banilad ug Tipolo.

Ang kadaghanan sa mga pasyente anaa sa 19-anyos nga maoy labing bata ug dili sab molabaw sa 63-anyos ang labing tiguwang.

Samtang ang Dakbayan sa Lapu-Lapu nakatala og pito ka bag-ong kaso sa Covid-19 hinungdan nga ang siyudad karon aduna nay 2,727 nga tanang kaso sa Covid-19 ug anaa sa 90 ang active cases.

Ang recoveries sa dakbayan anaa sa 2,525 ug 112 ang tanang namatay.

Sa maong datos sa DOH-7, ang Central Visayas adunay 26,193 total cases sa Covid-19 diin naa sa 1,670 ang active cases, 23,075 ang recoveries ug 1,448 ang nangamatay. — Romeo T. Limpangog