Kanhi kongresista, mayor namatay

CEBU, Philippines — Ang giisip nga “Amahan sa Kwarto Distrito” ug “Manluluwas sa Kwarto Distrito” nga si kanhi Cebu Fourth District Representative Benhur Salimbangon, nitaliwan na sa laing kalibutan sa edad nga 75, niadtong Disyembre 24, human sa duha ka tuig nga pakigbisog sa sakit nga cancer.

Ang iyang haya naa ron sa Curva Covered Court sa Curva, Medellin apan ibalhin kini nganha sa Cyrstal Palace sa Cosmopolitan Funeral Homes , Dakbayan sa Sugbo karong Disyembre 28 ngadto sa 29, ug ang lubong himoon sa Disyembre 30 adto sa Dakbayan sa Lapu-lapu.

Ang iyang anak nga si Marie Daphne ug si Francis pulos mipadayag sa ilang kasub-anan pinaagi sa ilang facebook post.   “Benhur was a loving brother, doting husband, guiding father, and caring Lolo. He was the father of the 4th district, the visionary of the North, and a true champion of public service - the epitome of commitment, integrity, and character. His memories will be forever etched in our hearts and his legacy will live on in the lives he had touched,” segun sa ilang post. Si Medellin Mayor Benjun Mondigo usab pinaagi sa iyang facebook mihulagway sa namatay nga kongresista nga usa ka matinud-anon nga leader ug daku og panglantaw alang sa malambuon nga 4th district of Cebu.

Samtang nitaliwan na usab ang Mayor sa lungsod sa Samboan nga si Mayor Emerito Calderon Sr niadtong Disyembre 23, 2020, sa edad nga 88-anyos tungod sa heart failure. Sa report sa Sugbo News ang news portal sa Probinsya sa Sugbo, ang anak niini nga si Vice Mayor Emerito “Doc Tito” Calderon, Jr. maoy nihulip kaniya ug nanumpa atubangan ni Cebu Governor Gwendolyn Garcia niadtong Disyembre 23 lang gihapon.

Kuyog ni Doc Tito ang iyang asawa ug ang iyang mga igsoon nga sila si kongresista sa 7th district nga si Peter John Calderon ug Samboan Association of Barangay Captains (ABC) President Raymond Joseph Calderon.

Ang first Councilor usab sa lungsod nga si Irving Gamallo maoy nanumpa isip bise mayor sa lungsod. – Le Phyllis F. Antojado