100 days countdown sa ika-500 years sa kristiyanismo sugdan karong adlawa

Cebu, Philippines — Sugod karong adlawa (Enero 17), opisyal nga ilusad sa Dakbayan sa Lapu-lapu ang mga kalihukan may kalabutan sa ika-500 ka tuig nga selebrasyon sa pag-abot sa kristyanismo dinhi sa nasud.

Subay niini makita na usab ang permanente nga pagkayab sa nasudnong bandila sa Pilipinas diha sa Liberty Shrine sa Mactan agig pagsanong sa resolusyon nga gipirmahan sa National Historical Commission of the Philippines (NHCP) nga nagmando sa NHCP sa pag-ila sa mga lugar sa nasud nga mahatagan sa ingon nga estado.

Kini nasubay usab sa kasaulogan sa ika-500 nga anibersaryo sa Kadaugan sa Mactan karong umaabot nga Abril 27, 2021.

Gawas sa nahisgutang makasaysayanon nga kalihukan, karong adlawa nagtimaan usab sa 100 ka adlaw nga pag-ihap sa nasangpit nga anibersaryo, nga gitudlo sa National Quincentennial Committee (NQC) isip D-Day sa 2021 Quincentennial Commemorations sa Pilipinas.

Parehong giila sa NHCP ug NQC ang kadaugan sa mga katigulangan sa nasud lakip na niini ang Battle of Mactan. (BANAT NEWS)