Jail officer gipatay sa 8 ka tawo

CEBU, Philippines — Patay ang usa ka jail officer kinsa gipaulanan og bala sa walo ka lalaki nga luwan sa upat ka motor niadtong Huwebes sa gabii sa Sitio Santa Cruz, Barangay Dunggoan, Dakbayan sa Danao.

Ang biktima giila nga si Jail Officer 2 Rexmon Roble Vasquez, 34, taga Barangay Cogon Cruz sa maong dakbayan.

Matud ni Police Staff Sergeant Allan Virtucio, desk officer sa Danao City Police Station, nga ang insidente nahitabo mismo atubangan sa Danao City Jail.

Nakita ang biktima nga nabulit sa samad pinusilan ang lawas duol sa multicab nga gipanag-iya niini.

Base sa inisyal nga pakisusi sa close circuit television camera sa lugar, walo ka tawo nga nag-facemask ang nipusil sa biktima.

Suway nga gidala sa tambalan ang biktima apan nakabsan gyud kini sa iyang kinabuhi.

Matud ni Police Master Sergeant Jose Michael Alegado nga on-duty isip jail guard ang biktima.

Naglingkod sa gawas nga bahin sa bilanggoan tapad sa nag-paking nga sakyanan ang biktima dihang kalit nahiabot ang upat ka motorsiklo nga gisakyan sa walo ka lalaki.

Sumala pa ni Alegado nga ang mga angkas sa upat ka motorsiklo maoy nagpaulan og bala ngadto sa biktima hinungdan sa pagkahagba niini.

Human sa pagpamusil dali nipabulhot pahilayo ang mga wala hiilhing lalaki luwan sa motorsiklo.

Si Alegado nidugang nga kasamtangang nagpabilin pa sila nga blangko sa pag-ila sa mga mamumuno sa biktima. —Romeo T. Limpangog/GMR (BANATNEWS)