Maguwang gipatay sa manghud; Gidudahang asset gipusil patay

CEBU, Philippines — Nasikop ang usa ka 60-anyos nga lalaki kinsa suspetsado sa pagpatay sa iyang maguwang babaye niadtong Sabado sa gabii diha sa Barangay Manatad, Lungsod sa Sibonga.

Ang suspetsado mao si Juan Razonable kinsa nadakpan sa kapolisan diha sa Barangay Bato sa maong lungsod.

Ang biktima mao si Fraxzedes Razonable, 72-anyos, dalaga.

Matud ni Police Corporal Francis James Obenza, duty desk officer sa Sibonga Police Station nipahibalo ang anak ni Juan nga ang amahan niini ang nihimo sa krimen ug andam kini nga motahan sa iyang kaugalingon.

Ang kapolisan nihimo og operasyon sa pagsikop sa suspetsado kagahapon sa buntag.

Base sa imbestigasyon sa kapolisan nga ang suspetsado nasuko kini sa iyang maguwang tungod kay giingong gipanglarot sa biktima ang mga lubi nga iyang tinanom.

Ug sa kalagot sa suspetsado giadto niya ang biktima ug gidunggab hinungdan sa kamatayon niini.

Sa laing bahin, patay ang giingong asset sa kapolisan human kini pusila sa nagmotorsiklo nga mga lalaki diha sa Abalo Street, Barangay Cansojong, Dakbayan sa Talisay niadtong Martes sa hapon.

Ang biktima mao si Nelma abalos, 38-anyos, nagpuyo sa maong lugar.

Ang kapuyo sa biktima nga si Roel Morales, 48-anyos nagkanayon nga sa wala pa ang pagpamusili nakigtabi sa ilang mga silingan gawas sa ilang pinuy-anan si Nelma.

Namatikdan nila nga adunay duha ka lalaki nga nagsakay og motorsiklo ang nikanaog ug nangita kang Nelma ug dihang nakit-an nila ang biktima gidretso kini og pusil.

Ang biktima naigo kini sa tuong bahin sa iyang lawas hinungdan sa pagkahagba niini.

Ang mga kriminal daling nisibat human sa hitabo samtang ang biktima gidala diha sa Talisay City District Hospital apan nakabsan gyud kini sa kinabuhi.

Matud ni Morales nga gikan sila nagpuyo sa B. Rodriguez sa Siyudad sa Sugbo apan namalhin sila sa Dakbayan sa Talisay tungod kay sila maoy permamenteng pasanginlan sa mga ilegalista matag adunay operasyon nga mahitabo. —Gabriel C. Bonjoc/BDB (BANATNEWS)