Party sulod sa hotel rooms gidili sa EO ni Labella
CEBU, Philippines — Matangtangan og business permit ang mga hotel nga mosupak sa executive order nga giluwatan ni Cebu City Mayor Edgardo Labella kabahin sa pagpahigayon og mga party sud sa hotel.
Hugot nga gimanduan ang mga nagdumala og hotel nga dili gyud tugtan ang ilang guests nga mopahigayon og mga party sulod sa hotel rooms.
Giklaro ni Mayor Labella sa iyang order nga kinahanglan nga sa mga function room lang mahimong maka-party.
Base usab sa lagda, kun naka-modified general community quarantine (MGCQ), magamit ang function room sa 50% lang sa kapasidad niini ug kinahanglan usab nga mosubay kini sa tanang lagda nga giisyu sa Department of Tourism.
Matag 20 sqm nga room, usa lang ang puwede makasulod niini, mahimo rapud duha kun nag-ipon na kini daan sa pagpuyo.
Duha ra ka guests ang makasulod sa room nga dunay gidak-on nga 21 hangtud sa 29 sqm, ug tulo ka tawo alang sa 30 hangtud sa 39 sqm nga room.
Makasulod ra pud ang upat ka tawo alang sa 40 hangtud sa 49 sqm nga room , samtang lima ka tawo sa 50 sqm pataas nga hotel room ug dili pud molapas og alas otso sa gabii ang pag-istar sa mga bisita.
Lakip sa gipatabang sa pag-implementar niini mao ang Cebu City Police Office (CCPO), Armed Forces of the Philippines (AFP), Business Permit and Licensing Office (BPLO), Cebu City Tourism Office, Cebu City's Environmental and Sanitation Team (CESET), Prevention, Restoration, Order, Beautification, and Enhancement (PROBE Team), mga management sa hotel uban sa koordinasyon sa DOT ug sa Hotels Resort and Restaurant Association of Cebu Inc. (HRRAC). —Rowena D. Capistrano/MEL (BANATNEWS)
- Latest
