Cebu City apil sa prayoridad sa COVID-19 vaccine

Cebu, Philippines — Malipayong gipahibalo ni Mayor Edgar Labella nga nipasalig ang nasudnong kagamhaman nga usa ang dakbayan sa hatagan og prayoridad alang sa distribusyon sa vaccine sa pakigbatok sa COVID19.

Nahinabi sa mayor kagahapon ang vaccine czar nga si Secretary Carlito Galvez Jr.  ug mao kini nipahibalo kaniya sa maong maayong balita.

Motabang usab kini sa pagkonektar niini ngadto sa manufacturer sa vaccine sama sa Pfizer ug AztraZeneca. Dugang pa ni Labella nga dili masukod ang gibati niya nga kalipay pagkahuman nila og estorya ni Galvez.

Nagkanayon ang mayor nga dako kaayo kini og tabang sa katawhan ug gipaabot nalang niya ang guidelines.

Dili pa hinuon matino ang tataw nga buwan sa pagbaton og stocks sa vaccine.  Suma pa ni Labella nga gawas sa alokasyon sa national government , nag-andam na usab og pundo ang siyudad alang sa maong katuyoan.

Una na nga gitinguha sa mayor ang pag-andam og P500 milyones nga alokasyon alang sa pakigbatok coronavirus disease 2019 (COVID-19) kun diin dinhi usab kuhaan og budget alang sa pagpamalit og vaccine.

Giklaro ang mayor nga kun makabaton na ang siyudad og vaccine, libre kini nga idalit ngadto sa iyang mga konsituwente.

Nagkinahanglan sa mainampingon ug karkulado nga lakang ang pagpalit Og bakuna batok sa Covid-19 kini ang gibutyag sa Department of Health.

Ang tigpamaba sa DOH-7 Dr. Mary Jean Loreche nitug-an nga kinahanglan nga maghiusa ang pribadong sector ug Local Government Units kinsa nagtinguha sa pagpalit ug bakina sa pagsiguro nga ang resulta epektibo.

Sumala pa ni Loreche, kinahanglan 60 porsiyento sa tibuok populasyon ang mabakunahan aron makab-ot ang pundok sa immunity kung gusto nila mahatagan ug immunization ang komunidad.

Gitug-an ni Loreche,  usik lang sa kwarta ug panahon kung dili makab-ot, hinungdan kinahanglan ang partnership ug collaboration aron molampos ang plano. – Rowena D. Capistrano ( BANAT NEWS)