Palma mag-Misa de Gallo sa tulo ka simbahan
CEBU, Philippines — Tulo ka mga simbahan ang gikatakdang misahan ni Cebu Archbishop Jose Palma sa pagsugod na sa Misa de Gallo sa dili pa ang adlaw sa Pasko. Sukwahi kini sa una nga plano sa wala pa ang pandemic nga sa siyam ka mga karaang simbahan sa lalawiganang iyang misahan.
Sa wala pa nibuto ang pandemiya planado na unta ang mga simbahang maoy misahan ni Palma.
Kini mao ang simbahan St. Peter and Paul, Bantayan Island, Archdiocesan Shrine of San Nicolas de Tolentino, St. Catherine of Alexandria Parish,Carcar City, Archdiocesan Shrine of St. Joseph Mandaue City ug uban pa kini subay unta sa ika- 500 tuig nga kasumaran sa kristyanismo sa nasud.
Sa bag-ong nausab nga plano, ang arsobispo magmisa sa Disyembre 16 sa Archdiocesan Shrine of Immaculate Heart of Mary sa Minglanilla; Disyembre 18-CCTN ug Disyembre 19 sa Pulpogan, Consolacion.
Matud pa sa Arsobispo tungod sa Covid-19 pandemics, madis-og sa sunod tuig ang pagpahigayon ug Santos nga Misa sa siyam ka mga karaan nga simbahan.
Hinuon bukas pa gihapon siya sa iyang mga schedule alang sa dugang mga simbahan.
Giawhag ni Palma ang tanang magtutuo nga padayong motamod sa mga health protocols ug minimum health standards nga gipatuman sa lokal nga pangagamhanan ug departamento sa panglawas ilabi na sa kadtong manambong sa Misa de Gallo.
Marshals
Sa pikas bahin, gipaubos na og seminar ug mga workshops ang dul-an sa 70 ka volunteers sa Basilica Minore del Santo Niño de Cebu isip pagpangandam sa nagkaduol na nga Misa de Gallo. Gi-train usab sila sa pagpadangat og first aid kun dunay moabot nga emerhensya. Samtang gipahibalo na usab sa maong simbahan ang ilang skedyul sa mga misa.
Tumanon niini ang rekomendasyon sa kagamhanan sa siyudad sa Sugbo nga magmisa panahon sa kagabhion gawas sa naandan nga kaadlawon.
Ang Basilica adunay Misa de Gallo sa alas 7:30 sa gabii gikan sa Disyembre 15 -23. Samtang ang laing skedyul mao ang alas 5:00 sa kadlawn gikan sa Disyembre 16-24.
Usa ka miyembro ra
Andam na ang mga simbahan dinhi sa Siyudad sa Sugbo alang sa Misa de Gallo nga mosikad na karong December 16.
Kini maoy gibutyag ni Konsehal Phillip Zafra kinsa maoy gitahasan ni Mayor Edgar Labella paghimo og koordinasyon sa simbahan kauban si Konsehal Dave Tumulak bahin sa misa de gallo ug relihiyosong mga kalihokan.
Nagbutang gyud og markings ug signages ang mga simbahan aron tulin unya ang pagsulod sa mga tawo ug mamintinar ang social distancing. Gipahimangnoan ni Zafra ang katawhan nga mo-follow gyud sa health prtocols. Gidasig usab niya ang manimbahay nga sa matag pamilya , usa lang ang pisikal nga moadto sa simbahan , samtang ang ubang sakop niini , adto lang motambong sa online mass. “Sa maong pamaagi , malikayan pud natu ang pagdugok sa katawhan. Sa milabay nga mga katuigan, basta Misa de Gallo gani, magbaha gyud na ang mga tawo,” suma pa ni Zafra.
Ang gobiyerno nagtugot lang og 50% nga kapasidad sa mga simbahan nga mahimong makasulod.
Alang sa pagpahigayon og Misa de Gallo sa lahi nga venue, kinahanglan pud kini mangayo og pagtugot sa buhatan sa mayor sanglit i-check pa kini sa Cebu City Emergency Operations Center kun haom ba ang lugar sa pagphigayon og misa.— Sanden J. Anadia/IBM (BANATNEWS)
- Latest