Palma nasubo aning mga insidente sa paghikog

Cebu, Philippines — Gikasubo ni Cebu Archbishop Jose Palma ang balita nga adunay magtiayong nagpinatyanay ilabi na ning panahon sa COVID-19 pandemics ug taliabot na ang Pasko.

Labing gikagul-an sa Arsobispo mao ang kaugmaon sa mga anak sa magtiayon tungod sa maong hitabo. Ang gipasabot ni Palma mao ang magtutudlong babaye nga gipatay sa iyang bana, ug pagkahuman naghikog sab ang nauwahi.

Ang krimen nahitabo didto sa ilang panimalay sa Dakbayan sa Talisay niadtong adlaw nga Biyernes human sa matud pa panaglalis sa duha.

Ang Arsobispo, niawhag sa katawhan nga iampo  ang mga tawong nagkutlo sa kaugalingong kinabuhi tungod kay wala may nasayod sa mga rason ug mga sirkumstansya kung nganong naabot sila sa maong punto.

Gipahinumdoman ni Palma nga diha sa sud sa pamilya magsugod ang kalinaw ug paghigugma. Matud niya kinahanglang iampo kanunay ang kaayohan ug kalig-on sa relasyon sud sa pamilya.

Sa lain nasab nga insidente sa paghikog, patay  ang usa ka 43- anyos nga lalaki sa Purok Pansat sa Barangay Kalawisan  sa Dakbayan sa Lapu-Lapu nga gituohang naghikog sulod sa ilang pansayan sa miaging Sabado sa kaadlawon.

Si Police Staff Sergeant  Maria Filipina Branzuela sa kapolisan sa Presinto 3  sa Lapu-Lapu City Police Office (LLPO) miingon nga ang asawa sa namatay maoy nakadiskubre sa bana nga nagbitay na sa pansayan.

Gidala nila kini sa Lapu-Lapu City Hospital apan gideklarar kini sa mga doktor nga dead on arrival.

Si Baranzuela miingon nga ang asawa nitug-an nga na-depressed ang iyang bana tungod sa  problema sa anak nga lalaki ug sa minor de edad nga kapuyo niining babaye.— Romeo T. Limpangog ( BANAT NEWS)