Mga motor nga nagpasilong sa SRP Subway giharos sa SUV, usa patay laing pito angol

Cebu, Philippines — Usa ka babaye ang nakalas, samtang dili mominos usab pito ang angol sa dihang usa ka sakyanan ang midaro kanila diha sa South Road Properties Subway Huwebes sa gabii.

Ang nakalas giila sa kapolisan nga si Stephanie Hetutua, 26, taga lungsod sa Minglanilla nga nagangkas og motor.

Samtang ang mga naangol mao silang si Police Captain Angelito Valleser, 44,  Jill Pacaña, 44;  Klent Christian Mansueto, 26, Jessie Abay, 33,  Ronel Melecio; Joaquin Cutamora ug Armando Gonzaga, 50.

Sa mga naangol sila Valleser, Cutamora, Melecio ug Mansueto gidala sa tambalanan alang sa dugang pa nga pag-atiman.

Samtang ang nakadasmag kanila mao ang Toyota Land Cruiser nga gimaneho ni Tareq Leleng Farhat, 19, residente sa Junquera Street, Cebu City. Ang mga biktima giingong nagpasilong sa maong tunnel tungod sa pagbunok sa ulan.

Si Farhat sa iyang bahin nitug-an nga sakto ra ang iyang dagan, human siya naghatod sa iyang higala sa Talisay.

Pag-abot sa maong lugar nakurat kini sa mga motor nga nagparking apan bisan giunsa niya pag-brake ug tungod sa kadangog sa dalan naharos gyud niya sila og kadasmag.

Si Farhat nagtingkagol na karon sa Waterfront Police Station ug giandam na sa kapulisan ang pagpasaka og kaso.

Ang officer-in-charge sa Cebu City Disaster Risk Reduction Management Office (CCDRMO) nga si Ramil Ayuman gikatakdang makigtigom sa mga nagkadaiyang ahensiya sa gobiyerno aron tukion kining nahitabo sa subway.

“Ang description sa atong mga respondent, og duwa pa kuno, murag bowling gani. Igo gyud silang tanan, hasta ‘tong mga nagsunod sa luyo,” sumala pa ni  Ayuman.

“Daghan na kaayo og nadisgrasya dihang dapita and then we have. I think we have to revisit unsaon pag-address ani kay kahibawo baya ta sa concern sa atoang SRP Police sad nga way sakyanan. Kuwang og personnel so we have to address ni nga concern,” dugang pa niya.

Makauban sa CDRRMO sa maong tigom mao ang Cebu City Transportation Office (CCTO), Department of Public Works and Highways (DPWH) ug ang mga nagdumala sa SRP.

“Initially, ang CCLEX pud willing pud sila motabang sa aspect sa mga signages, “ niya pa.— Sanden J. Anadia ( BANAT NEWS)