Cash incentives alang sa mga atleta mahatag sa di pa matapos ang 2020
Cebu, Philippines — Sa dili pa matapos ang 2020, gipaabot nga mahatag na ang cash incentives gikan sa Cebu City Government alang sa Cebuano athletes nga nakadaog sa 30th Southeast Asian (SEA) Games niadtong 2019.
Giaprubahan sa Cebu City Council ang resolusyon nga gi-sponsor ni Konsehal Donaldo Hontiveros aron mahatagan ang Cebuano medalists sa ilang cash incentives nga dunay suma total nga P2 million.Kahinumdoman nga taud-taod na kini nga gi-follow up sa athletes busa nangayo og pasaylo si Hontiveros.
Sa usa ka seremonya sa city hall niadtong Disyembre sa miaging tuig, gisaad ni Mayor Edgar Labella ngadto sa mga atleta nga hatagan gyud kini og cash incentives.
Mapasalamaton si Hontiveros sa kaubanan niya sa konseho nga ni-aprobar dayon sa iyang resulosyon sanglit nakahatag man gyud og garbo sa Sugbo ang dul-an sa 35 ka mga Sugbuanon nga mga atleta. Ang gold, silver ug bronze medalists gipaabot nga makadawat og P100,000, P50,000, ug P25,000.
Nagmalaumon si Hontiveros nga makasabot ra ang mga atleta kun nganong nalangan kini. Nagkanayon ang konsehal nga nisuway siya og duso niini aron makarga kini sa supplemental budget sa tunga-tungang bahin karon tuiga apan naabtan kini sa pandemya.
Dugang pa ni Hontiveros gipangitaan na usab niya karon og paagi kauban si Konsehal Gerry Guardo aron mapun-an ang maong incentives base sa gisaad ni Labella kaniadto nga P300 mil alang sa gold medalist , P200 mil sa silver medalist ug P100 mil sa bronze medalist. ( BANAT NEWS)
- Latest