Ordinansa pag-umol og health and wellness program giaprobahan
Cebu, Philippines — Giaprobahan sa Cebu City Council ang ordinansa alang sa pag-establisar og usa ka wellness and healthy lifestyle program sa tanan nga barangay sa siyudad.
Ang ordinansa gitawag og “Cebu City Wellness and Healthy Lifestyle Program Ordinance” nga gipangamahanan nila ni Konsehal Alvin Dizon ug Franklyn Ong.
Ang City Health Office maoy gitahasan nga imonitor ang pagpatuman sa ordinansa ug makig-alayon sa mga barangay pinaagi sa Association of Barangay Councils (ABC), Department of Social Welfare Services (DSWS), Barangay Nutrition Scholars (BNS), ug Barangay Health Workers (BHWs).
Ubos sa maong programa ipadayon usab ang pag-edukar sa katawhan kabahin sa COVID-19. Usa ka wellness day ang pagahimuon sa barangay kaduha sa usa ka tuig aron mag-organisar og libre nga serbisyo medikal.
Nalatid usab sa ordinansa ang pagdasig sa matag barangay sa pagpasar og resolusyon o ordinansa nga mag-awhag sa tanan nga mga negosyo nga naa sulod sa ilang hurisdiksyon nga magsugod sa health and wellness programs sa ilang mga trabahoan.
Ang siyudad mogahin og P5 milyones nga pundo sa general fund isip tabang sa mga barangay alang sa pagpatuman sa health and wellness program. ( BANAT NEWS)
- Latest