Pag-usab sa curfew himoon nonot sa misa de gallo

CEBU, Philippines — Tinguha ni Mayor Edgardo Labella nga usbon ang oras sa curfew sa Dakbayan sa Sugbo nonot sa ipahigayon nga misa de gallo sugod karong Desiyembre 16-24 2020.

Sumala pa ni Labella nga usa ka executive order ang iyang ipagawas kabahin sa misa de gallo ug kinahanglan ang health protocols tamdan sa tanang parokya ug ang pagtuman sa 50 porsyento nga capacity limit ug lakip usab ang pagsunod sa social distancing.

Una niini ang CBCP mirekomendar nga mahimong sugdan ang simbang gabi sa alas sayes pa lang sa gabii ug ang kataposang misa ngadto na sa alas sayes sa buntag.  Padayon nga gidasig sa CBCP ang pagpahigayon og online streaming sa mga misa ug sa mga kalihukan sa simbahan.

Ang Vice-Chairman sa Archdiocesan Commission on Worship Fr. Japhet Geonzon, nitug-an nga sa pagka karon wala pa sila nagkatagbo sa buhatan sa Arsobispo sa Sugbo Archbishop Jose Palma, tungod kay nagpaabot pa sila sa final nga hukom gikan sa buhatan ni Mayor Edgardo Labella.

Samtang sa Dakbayan sa Lapu-lapu tinguha usab ni Mayor Junard Ahong Chan ang temporaryo nga pagsuspenso sa gipatuman nga curfew panahon sa misa de gallo.   Matud pa ni Mayor Chan nga gisugyot sa kaparian ang pagpahigayon og Misa de Gallo sa alas 4:30 ang takna sa kadlawon.

Usa ka executive order ang luwatan usab ni Mayor Chan nga magsuspenso sa curfew sud lang sa siyam ka adlaw nga panahon sa misa de gallo. —Romeo T.  Limpangog/MEL (BANATNEWS)