50 imprastraktura nangaguba sa baha
CEBU, Philippines — Dul-an 50 ka mga imprastraktura ang nabahaan ug nangaguba tungod sa baha nga nasinati sa pipila ka mga lungsod sa Probinsya sa Sugbo niadtong niaging adlaw.
Sumala sa report sa Provincial Disaster Risk Reduction and Management Office (PDRMMO), didto sa Tuburan, tulo ka balay sa barangay Otso ug Jagbuaya ang na totally damage samtang unom ka classrooms sa Bakyawan Elementary School ang partially damage.
Sa Balamban, 34 ka balay sa barangay Nangka ang nabahaan, usa ka nipa hut ang naguba ug usa ka flood control project sa DPWH sa barangay Cantuod ang nagusbat.
Didto sa Compostela usa ka balay sa barangay Tamiao ang partially damage samtang didto sa Danao, ang usa ka foot bridge sa barangay Danasan ug usa ka nipa hut ang naguba.
Moabot usab sa 465 ka pamilya o 1, 895 ka indibidwal ang napabakwit. Kini gikan sa 43 ka pamilya o 215 ka indibidwal gikan Balamban, 369 ka pamilya o 1, 465 ka indibidwal sa Tuburan, 30 ka pamilya o 113 ka indibidwal sa Danao, 16 ka pamilya o 80 ka tawo sa Asturias ug pito ka pamilya o 22 ka indibidwal sa Compostela ang nakabakwit atol sa pagbaha.
Hinuon nakauli na ni sila tanan sa ilang mga panimalay kagahapong adlawa. Gawas sa naanod ug namatay nga lalaki sa Danao wala nay laing nakalas pa nga kinabuhi atol sa pagbaha sa niadtong Miyerkules.
Si Cebu Governor Gwendolyn Garcia gikatakda ni nga mosusi sa mga lugar nga gibahaan karong adlawa. —IBM (BANATNEWS)
- Latest