Garcia: Kadtong adunay sintomas lang ang i-swab
CEBU, Philippines — Si Gobernador Gwendolyn Garcia nipahimangno ngadto sa mga health officer sa nagkadaiyang local government unit sa probinsiya nga kadto lang adunay sintomas sa COVID-19 ang ipaubos sa swab testing.
Kini human si Garcia nakadawat og reklamo kalabot sa mga trabahante nga giingong walay sintomas apan gi-isolate samtang naghulat sa resulta sa swab test.
"Naay nireklamo nako diri ron, kanang MHO diha sa Tuburan. Ambot nganong nag sige na og testing anang mga walay symptoms when the DOH protocol and my memorandum is kanang naay symptoms mao nay i-swab pero gi-swab kuno ni iyang mga nagtrabaho mura'g pito ni kabuok", butyag ni Garcia.
"In the meantime gi-isolate kay gi-swab lage dili patrabahoon, unom na ka adlaw wala pa ka trabaho, unsa may ipakaon nila sa pamilya ana?", dugang ni Garcia.
Nakadawat usab og report si Garcia nga bayaw sa usa sa mga provincial board members gi-swab usab bisan og walay sintomas ug gipa-isolate diha sa usa ka hotel.
Matud ni Garcia nga ang pamilya niini pulos negatibo ug dihang ikaunom na nga adlaw sa isolation nagpaubos og balik sa swab test ug nagnegatibo apan bisan pa sa maong resulta gipahuman gihapon niini ang mga adlaw sa isolation.
"Kay lage 14 days ang isolation, dili pagawason sa hotel nga magbayad siya og P7mil kay i-isolate sya'g 14 days, isn't that ridiculous?”, ni Garcia pa. Si Garcia nipahimangno sa mga municipal ug city health officers nga mosubay sa iyang memorandum ug sa DOH. —BDB (BANATNEWS)
- Latest
