DedEd misugyot og virtual Christmas party sa mga tinun-an
CEBU, Philippines — Aminado ang regional director sa Department of Education (DepEd-7) nga si Dr. Salustiano Jimenez nga kun musulod na gani ang buwan sa Disyembre, kanunay gyud maghinam-hinam ang mga estudyante sa mga Christmas Party. Subay niini gipahimangnoan ni Jimenez ang mga ginikanan nga kinahanglan nga pahinumdoman ang ilang mga anak nga dili pa panahon sa mga tapok-tapok.
Apan kun ganahan gyud kini og party, mahimong pasuwayan niini ang usa sa bag-ong normal nga tapok-tapok ug kini mao ang virtual Christmas Party.
“Duna koy nadunggan nga ingon niana nga mga party, gibuhat napud na sa ubang schools. Kun ganahan gyud sila og party, ipaagi nalang og online. Sa maong pamaagi, mas safe ang mga bata kay naa ra sila sa ilang tagsa-tagsa ka panimalay,” suma pa ni Jimenez.
Una na niya nga gibutyag nga wala pa silay gitugotan nga mga gathering nga pisikal nga tambongan sa mga estudyante. Matud pa niya nga karong panahona importante kaayo nga magpuyo ra gyud sa balay ang mga estudyante aron dili kini mataptan sa COVID19.
Suma pa ni Jimenez nga kun mohatag og dakong kooperasyon ang katawhan, seguradong magmalampuson gyud ang kampanya sa pakigbatok sa gikabalak-an nga virus. —MEL (BANATNEWS)
- Latest
