Gullas dili na mag-agad sa developer pagsulbad sa baha
CEBU, Philippines — Si Mayor Gerald Anthony “Samsam” Gullas Jr. sa Dakbayan sa Talisay giingong dili na mag-agad sa developer nga maoy mo ayo sa kanal diha sa usa ka subdivision sa Molave Street Purok 1 Juan Luna sa Barangay Tabunok.
Kini aron mahatagan na og kasulbaran ang dugay na nga giantos nga problema sa mga residente diha sa nahisgutang lugar.
Ang mga residente sa lugar nipaabot sa ilang reklamo ngadto sa mga sakop sa media nga ang ilang dapit naglunang sige sa tubig.
Matud ni Gullas nga iyaha kining ipasusi sa legal department aron masuta kong mahimo ba sila nga mopatrabaho nga dili makwestiyon sa Commission on Audit (COA).
Gipasabot ni Gullas nga madugay na og sulbad ang maong problema kong mag-agad pa sila sa developer nga maoy mogama og lakang.
Nasayran nga bisan og grabe ang kainit sa panahon apan ang tubig diha sa lugar dili gihapon kini mohubas.
Ang sinaligan sa developer nagkanayon nga iyahang ipaabot sa ilang mga labaw ang maong problema sa mga residente. –BDB (BANATNEWS)
- Latest