Lima ka lider sa militante giaresto

CEBU, Philippines — Gisaway sa Partido Manggagawa ang pagdakop sa lima nila ka mga lider ug organizers  sa Cebu samtang ang Bukluran ng Manggagawang Pilipino - Cebu nireklamo sab nga 20 nila ka mga sakop ang gibabagan ug wala hinuon makatambong sa Bonifacio Day rally kagahapon.

Ang PM naglusad og rally sa ganghaan sa Mactan Economic Zone in Lapu-Lapu City samtang ang BMP sa Fuente Osmeña Rotunda sa Cebu City.

Giila ni PM chairman Rene Magtubo ang mga giaresto nga mao silang Dennis Derige, Myra Opada, Joksan Branzuela, Jonel Labrador ug Cristito Pangan.

Si Atty. Stephanie Claros miigon nga tulo sa gidakop gipriso karon sa Lapu-Lapu City Police Station tungod sa ‘disobedience.’ Sila mao si Derige, Branzuela ug Labrador.

Samtang ang laing duha gipamulta tungod sa kalapasan sa quarantine protocol ug gibuhian na.

Ang maong protesta gihimo sa grupo nunot sa bag-ohay lang nga pagpanaktak og 300 ka empleyado sa usa garment factory nga nagbase sa MEZ

Sa laing bahin, mireklamo ang BMP ug Sanlakas -Cebu  pinaagi ni  Teody Navea, BMP Cebu chairperson ug mao sab ang Sanlakas Cebu secretary-general tungod 20 nila ka sakop ang gibabagan sa mga polis ug wala pakuyoga sa rally nila sa Fuente Rotunda sa Cebu City. Malampuson hinuon nilang napahigayon ang kalihokan human sila gihatagan og 10-minutos sa kapolisan tungod kay wala silay permit. Nakasentro ang ilang isyu sa mga mamumuo nga nawad-an og trabaho, ayuda para kanila, anti-terror law, ug ang Covid-19. — Decemay Padilla/IBM (BANATNEWS)