DSWD, Sen. Go nitunol og hinabang sa mga nasunogan
CEBU, Philippines — Mga nasunogan sa Barangay Pahina-Central ug Barangay Kalunasan sa Cebu City gipadad-an og hinabang sa buhatan ni Senador Christopher “Bong” Go.
Ang grupo ni Go nangapud-apod og mga pagkaon, medisina, financial assistance, food packs, masks ug face shields sa 217 ka mga pamilya diha sa Barangays Pahina Central ug sa Kalunasan niadtong adlaw nga Miyerkules diha sa ilang tagsa-tagsa ka gymnasiums.
Ang senador subling mipahinumdom sa mga biktima nga dili kalimtan ang pagtamod sa gipatumang health safety protocols sa gobiyerno nunot sa pandemiya sa Covid-19.
Gawas sa maong mga hinabang, nanghatag sab kini og mga bisekleta sa mga piniling biktima aron ilang magamit nga alternatibong transportasyon para sa ilang panginabuhian.
Duna say mga tinun-an nga gihatagan og mga gadgets nga tablets aron magamit sa ilang online education nunot niining gipatuman karong blended learning sa DepEd.
“Pakiusap ko sa mga estudyante, mag-aral kayo ng mabuti dahil ‘yan lang ang magpapasaya sa inyong mga magulang, ang edukasyon, ang makapagtapos kayo sa pag-aaral. ‘Yan lamang ang ating puhunan kaya mag-aral kayo ng mabuti,” dugang pahinumdom ni Go.
Gipahibalo sab ni Go ang mga biktima nga kun maaprubahan nga epektibo og luwas kining bakuna batok sa Covid-19, prayoridad sa hatagan niini ang mga kabus ug kadtong gitawag nga vulnerable sectors.
Gawas sa grupo ni Go, diha sab ang mga representante sa Department of Social Welfare and Development-7 nga nangapud-apod sab og hinabang samtang ang Department of Trade and Industry ug National Housing Authority nitan-aw kun kinsa ang posibleng mamahimong benepisaryo sa livelihood ug housing assistance sa gobiyerno.
Matud ni Go, andam kanunay ang gobiyerno sa pagtubag sa panginahanglan sa katawhan kun maabot kini sa ilang atensyon.—IBM (BANATNEWS)
- Latest
