Ginang nitago sa kisame, kabit sikop

CEBU, Philippines — Ginang ug kabit niini nga seaman nadakpan sa bana nga usa sab ka seaman kauban ang mga polis sa sud sa usa ka motel diha sa North Reclamation Area sa Dakbayan sa Mandaue. Ang babaye, mitago sa kisame, apan nasakpan.

Gitanggong karon sa Presinto 2 ang 40 anyos nga babaye  kauban sa 43 anyos niyang kabit nga giingong seaman. Ang relasyon sa duha dili na diay sekreto sa bana tungod kay daan na kining nakamatikod.

Matud pa nga sayong migikan sa ilang panimalay sa Dumlog, Dakbayan sa Talisay padung sa Cebu City ang magtiayon kay mo-duty sa mall ang babaye sa gitrabahoang mall.

 Ang duha nanakay og taksi, apan pagabot sa usa ka gasolinahan nagpasumangil ang bana nga mokanaog kay aduna kini kinahanglang paliton ug paunahon nalang ang asawa sa trabahoan niini.

Pagbiya sa taksing gisakyan sa asawa, nisakay sab og laing taksi ang bana ug gisundan kini hangtud sa Pier area sa Cebu City ug didto nakita sa bana nga gihapit sa asawa ang usa ka lalaki ug mibiya sa lugar.

Wala nila gilung-an pagsunod ang taksi hangtud nga nisulod sa maong motel ang taksi. Ang bana milahos pagadto sa presinto aron pagpangayo og tabang sa kapolisan.

Kauban ang mga polis, girumbo sa grupo ang lawak sa motel diin nag-check-in ang duha.

Ang roomboy sa motel maoy gipatuktok apan ang nangabli mao lang ang lalaki. Sa pagsulod sa mga polis ug sa bana diha sa lawak wala kini kauban sa sulod.

Apan nasakpan gihapon ang babaye nga atoa na diay miluklok og tago ibabaw sa kisame. Ang babaye gipakanaog sa mga polis ug silang duha gidala sa presinto.

Gipaabot nga mopasaka og kaso ang bana batok sa duha. —IBM (BANATNEWS)