Karsada sa Pooc huot ang trapiko tungod sa road repair
CEBU, Philippines — Nisamot ang kahuot sa trapiko diha sa sudlonon nga karsada sa Barangay Pooc, Dakbayan sa Talisay human gisugdan ang laing pag-ayo sa karsada diha sa lugar.
Si Jonathan Tumulak, hepe sa City of Talisay-Traffic Operations and Development Authority (CT-TODA) nagkanayon nga atol sa peak hours masinati ang grabe nga kahuot sa trapiko.
Matud ni Tumulak nga adunay diversion road alang sa mga motorista nga dili gyud kalikay sa pag-agi diha sa maong lugar.
Una niini, ang F. Bas nga karsada diha sa luyo nga bahin sa Talisay City Hall ang giayo ug nahuman na kini hinungdan nga ang karsada na usab sa laing lugar ang giayo.
Ang gihimo mao ang road repair ug road concreting sa 600 metros nga karsada diha sa Barangay Pooc.
Mahimo gihapon nga kaagian ang lugar apan magpuli-puli sa pag-agi ang mga sakyanan.
Gikatakda nga matapos ang proyekto sa dili pa ang pasko. –BDB (BANATNEWS)
- Latest
