Mga drayber sa TPUJs sa Mandaue di interesado?

CEBU, Philippines — Hanap pa kun dunay traditional public utility jeepneys (TPUJs) nga makapamasahero sa Dakbayan sa Mandaue human nga wa pay bisan us aka drayber nga mihikay sa ilang rekisitos.

Wala pay bisan usa nga nikuha og clearance sa Traffic Enforcement Agency of Mandaue (TEAM).

Ang clearance gikan sa TEAM maoy usa sa mga rekisitos nga kinahanglang unahon pagkuha sa mga drayber aron maproseso ang ilang pagkuha og special permits aron makabalik sa pamasahero.

Karong Disyembre 1 hangtud Disyembre 4 mao ra ang adlaw nga magbukas ang one stop shop nga gilusad sa siyudad inabagan sa Land Transportation Franchising and Regulatory Board ingon man sa Land Transportation Office  aron makabalik og pamasahero ang mga drayber sa TPUJs. Diha sa one stop shop himuon ang vehicle inspection sa mga pasaheroan diin tan-awon kun roadworthy o luwas pang ipamasahero ang PUJ ug kinahanglang nabutangan na kini og mga barriers agi og pagsunod sa gimando nga physical distancing.

Si Arnold Malig-on, operations head sa Traffic Enforcement Agency of Mandaue (TEAM) miingon nga hagbay ra nilang gipanawagan ang mga drayber ug operator bahin sa pagpabalik kanila pamasahero.  Apan hangtud ning pagsuwat sa balita, wala pay bisan usa ka drayber o operator nga mikuha og clearance sa ilang buhatan. Kining clearance ihatag ngadto sa mga drayber kun sila nakabayad na sa ilang  nangaging mga traffic violations.

Kadtong mahatagan og clearance mahimo ng molahos sa Emergency Operations Center sa siyudad alang sa libreng swab test, kadtong makapasar dad-on nila ilang PUJ sa one stop shop alang sa vehicle inspection.

Ang makapasar hatagan og special permit aron sila makabalik na sa pagpamasahero.

Nasayran sab nga dunay grupo sa mga drayber nga nihangyong ilaha lang tigi-tigihon ang pagbayad sa ilang nangaging traffic violations kung gusto silang pabalikon pagpamasahero tungod sa kakuwangon karon sa masakyan sa mga tawo.— IBM (BANATNEWS)