P30 milyones nga confidential fund sa mayor palaslasan ni Dizon

CEBU, Philippines — Girekomendar ni Cebu City Councilor Alvin Dizon nga laslasan o tangtangon ang gi-proposed nga P30 milyones nga budget alang sa confidential fund sa tuig 2021 sa buhatan ni Mayor Edgardo Labella.

Matud ni Dizon nga dako ra kaayo ang maong budget nga igahin sa confidential fund ni Labella.

“Dili man ta supak anang confidential funds kay normal man gud na nga dunay ubang gastohanan ang buhatan sa mayor. Pero kanang P30 million, dako ra kaayo. Naa pa gyud ta karon panahon sa pandemiya”, pasabot ni Dizon.

Hinuon tun-an pa kini sa finance committee sa konseho ug adunay posibilidad nga ipa-revise kini.

Matud usab ni Dizon nga P1 milyon lang ang budget sa confidential fund sa mayor niining tuiga ug taas kaayo ang pagsaka sa gahin nga pundo alang sa sunod tuig.

“By their very nature, the use of confidential and intelligence funds are difficult to audit, according to the Commission on Audit (COA)”, padayag ni Dizon.

Si Dizon nagkanayon nga sa maong kantidad labing maayo nga unahon ang mga nag-unang panginahanglanon  sama sa medisina ug bitamina sa mga senior citizen, livelihood program alang sa mga nawad-an og panginabuhian ug dugang food assistance alang sa mga kabus.

Si Labella sa iyang bahin, nagkanayon nga dili hutdon og gamit ang P30 milyones giandam lang kini ug gamiton lang usab kini kong gikinahanglan.

Matud ni Labella nga ubos sa P200 milyones nga budget sa peace and order program mahimo siya nga makagahin og 30 porsyento niini alang sa intelligence funds.

Nagpasabot kini nga mahimo ra unta nga P60 milyones ang igahin sa confidential funds apan mas gipili niya nga P30 milyones lang. —BDB (BANAT NEWS)