Mga drayber sa traysikol sa dakbayan sa Mandaue buot mobalik sa karaang rota

CEBU, Philippines — Gitinguha karon sa mga tricycle driver sa Maguikay, Casuntigan ug Cabancalan  sa Dakbayan sa Mandaue ang pagbalik  sa karaan nila nga mga rota.

Ang maong tinguha gipadangat sa nahisgutang mga drayber pinaagi sa ilang gipahigayong rally sa niaging adlaw diha sa atubangan sa city hall.

Si Poldo Pasiaw, chairman sa Maguikay, Casuntingan, Cabancalan-Tricycle Operators and Drivers Association (MCC-TODA) nagkanayon nga sa kasamtangan karon nila nga rota dili paigo ang ilang kitaon alang sa matag adlaw nga galastohan sa ilang pamilya.

Ang MCC-TODA gitugotang makabiyahe diha sa zone 1 o red zone nga mga dalan nga naglakip sa Casuntingan, Cabancalan, Maguikay, Tingub, Tabok, Pagsabungan ug Canduman.

Ang nahisgutang mga drayber nireklamo tungod kay giingong nihit ang mga mosakay diha sa nahisgutang mga lugar hinungdan nga nagtinguha sila nga makalahos diha sa Barangay Centro diin usab nahimutang ang merkado publiko.

Si Atty. John Eddu Ibañez, executive secretary  ni Mayor Jonas Cortes sa ilang panagtagbo tali sa kadagkoan sa Pagkakaisa ng mga Tsuper at Operators Nationwide (PISTON)  iyang gipasabot nga nisunod lang sila sa direktiba sa Department of Interior and Local Government  (DILG) nga nagdili sa mga tricycle sa pag-agi diha sa mga national highway.

Sa laing bahin, ang kagamhanan sa Dakbayan sa Mandaue niuyon nga ang mga drayber sa traditional PUJ nga adunay pending traffic violations mobayad pinaagi sa installment sulod sa unom ka buwan.

Matud ni Ibañez nga ang buhaton sa mga drayber sa traditional PUJs mao ang pagkuha og clearance gikan sa Traffic Enforcement Agency of Mandaue (TEAM). (BANAT NEWS)