Sementeryong tukoron andam ipaatras ni Labella
CEBU, Philippines — Gibutyag ni Mayor Edgar Labella sa Dakbayan sa Sugbo nga nagpaabot pa siya sa development plan sa gi-propose nga sementeryo nga tukoron diha Barangay Sapangdaku.
Matud ni Labella nga andam siya sa pag-atras niini kon masuta sa pagtuon nga makahatag kini og peligro sa panglawas sa tawo o maka-contaminate kini sa tinubdan sa tubig sa maong dapit.
Ang development plan sa nahisgutang proyekto padayon pa kining gihan-ay ni Konsehal Dave Tumulak.
Unang naumol ang ideya kaniadto nga pagtukod sa Cebu City Botanical Garden Cemetery (CCBGC) sa maong dapit diin mao kini ang lubngan sa mangamatay sa COVID-19.
Ang luna nga tukoran aduna kini gilapdon nga duha ka ektarya nga nahimutang diha sa Sitio Baksan ug Patay nga Yuta ug giingong layo kini sa kabalayan.
Nasayran nga adunay mga pasiunang public hearing niini kaniadto diin adunay uban nga mga residente sa lugar ang niuyon basta dili kini makadaot kanila.
Apan adunay wala usab mouyon tungod sa kabalaka kabahin sa sanitasyon.
Una na nga gihulagway sa kagamhanan nga dako kaayo og matabang ang maong proyekto ilabi na nga napuno na ang ubang mga pampublikong sementeryo dinhi sa Siyudad sa Sugbo. –BDB (BANATNEWS)
- Latest
