Durugista patay atol sa buy-bust, Laing upat ka pusher sikop

CEBU, Philippines — Patay ang usa ka suspetsadong pusher og shabu atol sa joint buy bust operation sa Provincial Intelligence Unit sa Cebu Provincial Police Office ug kapolisan sa Lungsod sa Liloan niadtong Martes sa hapon diha sa Barangay Poblacion sa nahisgutang lungsod.

Ang namatay mao si Melchor Pitogo Guc-ong, hingkod ang panuigon, nagpuyo sa maong dapit kinsa maoy target sa buy bust operation.

Sa maong operasyon nadakpan usab ang duha ka kauban sa suspetsado nga sila si Benjamin Montealto, 28 ug Jonna Jean Pogoy, 29 kinsa nakuhaan og lima ka gramong shabu nga nagkantidad tanan ngadto sa P50,000.

Si Police Major Randy Korret, hepe sa PIU sa CPPO ang nangulo sa nahisgutang operasyon.

Matud sa kapolisan sa Liloan Police Station nga  dugay na nilang nahibaw-an nga nalambigit sa ilegal nga kalihokan si Guc-ong diin aduna kini pending warrant of arrest sa pagkalambigit niini sa ilegal nga drugas ug nakaeskapo sa buy bust operation sa kapolisan kaniadto.

Ang suspetsado giingong nisukol kini sa mga polis hinungdan nga napusilan ug daling gidala ngadto sa Eversely Child Sanitarium Hospital sa Barangay Jagobiao sa Dakbayan sa Mandaue apan gideklarar kini sa mga doktor nga patay na nga naabot sa tambalanan.

Samtang ang pusher nga nagtrabaho isip job order sa Mandaue City Hall ang nadakpan usab sa buy bust operation sa Presinto 1 sa Mandaue City Police Office (MCPO). Si Police Major Ramil Morpos, hepe sa Presinto 1 sa MCPO niila sa suspetsado nga si Jessmark Lumapas, 33, nagpuyo sa Barangay Centro a maong dakbayan.

Nasakmit gikan sa suspetsdo ang 20 ka gagmay nga paketeng shabu.

Sa laing bahin, nasikop sa kapolisan sa Dakbayan sa Talisay ang usa ka high value individual atol usab sa buy bust operation sa kapolisan sa siyudad diha sa Sitio Hawod, Barangay Bulacao niadtong Martes sa hapon.

Ang suspetsado mao si Jeffrey Cabellon, 34, ulitawo, nagpuyo sa maong lugar. Matud pa ni Police Major Gerard Ace Pelare, hepe sa Talisay City Police Station nga si Cabellon dungog na kaayo ang pangalan niini sa mga operasyon sa kapolisan.

Nasakmit gikan kang Cabellon ang 50.60 gramos nga shabu nga nikantidad tanan ngadto sa P344,080. — Gabriel C. Bonjoc/BDB (BANATNEWS)