Labella, sakop sa Mayor’s Office gisurpresa’g drug test sa COSAP
Cebu, Philippines — Buhatan sa Mayor’s Office sa Dakbayan sa Sugbo gipaubos sa kinalit nga drug test sa mga sakop sa Cebu City Office for Substance Abuse Prevention pinangulohan ni Jonah John Rodriguez.
Matud pa ni Rodriguez, nag-una sa mga nagpa drug test si Mayor Edgardo Labella, kinsa mao usab ang author sa City Ordinance 1829 mahitungod sa drug testing sa mga kawani sa siyudad sa dihang kini usa pa ka konsehal.
Gipasalig ni Rodriguez nga surpresa ang maong drug test para sa dili mominos 40 ka mga sakop sa mayor’s office.
Gitug-an ni Rodriguez, kung adunay magpositibo ilaha kining iduso ngadto sa buhatan Cebu City Legal Office ug hatagan usab nila ug kopya ang HR department.
Sa mga napaubos na sa drug test adunay walo na ang nahagbong diin 3 gikan sa CCDRMO, 3 sa Local School Board, 1 sa Cebu City Transportation Office ug 1 sa DVMF.
Dugang pa ni Rodriguez, karong tuiga dili mominos sa 15 ka buhatan sa Cebu City government ug 10 ka barangay ang napaubos sa drug test.
Si Labella miingon nga gipahibalo lang ang tanan nga adunay ipahigayon nga meeting diha sa iyang buhatan ug way nasayod nga drug test diay kadto.
Mipasidaan si Labella nga walay luna sa iyang administrasyon ang mga tiggamitan og ilegal nga drugas. Kung adunay regular nga magpositibo moagi pa og due process apan kung sila casual o job order employees otomatiko silang taktakon. (BANAT NEWS)
- Latest