Mga drayber sa Ceres ipaubos sa drug test

CEBU, Philippines — Tungod sa sagunson nga aksidente sa kadalanan, diin duha gyud ka mga tawong nagbisekleta lakip sa nakalas nga naglambigit sa mga bus sa Ceres , angh Land Transportation Franchising and Regulatory Board (LTFRB)-7 mimando sa pagpaubos sa tanan nilang driver nga nagbiyahe sa amihanan nga magpa-drug test. Matud ni LTFRB-7 Director Eduardo Montealto, Jr. kagahapong adlawa ang masakpang positibo sa illegal nga drugas taktakon dayon.

“Ang northern-bound bus drivers lang sa nila ang among gi-orderan nga mo-undergo og drug testing ug driver’s examination kay sila man ang naay mga reported nga road accidents,” si Montealto miingon. Ang maong kompanya adunay 300 ka drivers nga nagbiyahe sa amihanang Sugbo. Ang test himuon sud sa 30 ka adlaw. Ipaubos sab sa eksaminasyon ang mga driver nga ihatag sa LTFRB ug kadtong di makapasar dili tugotang makapamasahero balik hangtud nga di sila makapasar sa pasulit.

Ang mga makapasar, ipaubos gihapon sa training bahin sa defensive driving sa maong ahensiya, Land Transportation Office,  ug sa Highway Patrol Group of the Philippine National Police. Niadtong nakalabay nga bulan, upat ka mga bus sa Ceres bus ang nalambigit sa aksidente – una niadtong Oktubre 2 sa dihang nabanggaan sa ilang bus ang usa ka trak sa Barangay Mabolo,; Oktubre 24 nakabangganay ang ilang bus sa usa ka ambulansiya sa North Reclamation Area sa Cebu City nga miangol og siyam ka tawo. Ang ikatulo ug ikaupat nga aksidenteng nalambigit ilang bus nahitabo niadtong Oktubre 30 ug 31 sa Mandaue City ug Consolacion dihang naligsan ang mga nagbisekleta.

Ang mga bus nga nalambigit sa aksidente gisuspenso og 30 ka adlaw.

Samtang si LTO-7 Director Victor Caindec miawhag sa mga local government units pagpanday og mas luwas ug maayong polisiya sa karsada. “Mark my words. Magsige pa gihapon ang disgrasya og dili ta mo-usab (More accidents will continue if we will not change). This will not be the last bike rider to die. This is not the last bus that will kill people. There will always be another speeding truck that will have an accident or an ambulance accident. And another motorcycle rider will die due to his or another driver’s carelessness,” si Caindec namahayag sa iyang Facebook post.

Matud niya, wala gidesinyo ang mga bisekleta nga makiguban sa mga de-makina sa karsada, ang mga bus ug trak wa sab gi-desinyo para sa mga gagmay nga dalan apan wala kini matuman. “LGUs put bike lanes pero walay klaro ang implementation. Naay usa ka LGU, gi-pintalan ang bike lane pero carwash ug repair shop sa motor nabulahan. We can’t put up bike lanes without properly protecting those who use these lanes,” dugang ni Caindec. Freeman/IBM