2 nagbisekleta patay sa bus
CEBU, Philippines — Patay ang duha ka tawo nga parehong nagbiseklita sa managlahi nga aksidente nga tanan naglambigit sa Ceres Bus sa Dakbayan sa Mandaue ug Lungsod sa Consolacion.
Nahitabo ang unang aksidente sa dalan M.C. Briones sa Dakbayan sa Mandaue sa Biyernes sa hapon Oktobre 30, 2020 nga mikalas sa kinabuhi sa 45 anyos nga security guard nga si Sandy Ursal, taga Lungsod sa Borbon.
Ang mga imbestigador sa traffic division sa Mandaue City Police Office (MCPO) miingon nga padulong na pauli ang biktgima dihang kalit lang nga nasaghiran sa mi-overtake nga Ceres Bus nga gimaneho ni Jerito Cabahug, 39, taga dakbayan sa Bogo.
Gumikan sa maong pagsaghid natumba ang biktima ug napasok ug naligsan kini nga nakaingon sa iyang kamatayon.
Sa laing aksidente nga nahitabo kagahapon sayo sa buntag naigo sa bus gikan gihapon sa maong kompanya ang siklista ug namatay kini diha sa national highway Barangay Pitogo, Lungsod sa Consolacion.
Ang drayber sa bus giila nga si Danny Responte, 32, taga Calatrava sa Negros Occidental. Samtang wa pa mailhi ang biktima atol ning pagsulat sa balita.
Base sa pasiunang report sa mga otoridad, ang maong bus padung sa Cebu City gikan sa amihanang Sugbo sa dihang nahitabo ang aksidente. /IBM (BANATNEWS)
- Latest