Mga PUJ drivers nga gusto ng makabiyahe nagparehistro

CEBU, Philippines — Gihimo na kagahapong adlawa ang pre-registration niadtong mga drayber sa tradisyonal nga PUJ  nga nagtinguhang malakip sa Balik-Pasada Program sa siyudad sa Sugbo.

Gituyo kini sa Cebu City Jeepney Task Force  aron makuha nila ang background sa mga  drayber ug mahatagan og schedule  alang sa pagpaubos niini sa COVID19 rapid test.

Human sa pagsusi kanila sunod tanawon ang ilang mga pasaheroan aron sutaon kun luwas pa ba kining padaganon ug kun unsay buhaton aron mapatuman ang social distancing.

Sayo pa , gipahibalo sa kagamhanan sa dakbayan nga 1,355 ang padaganong tradisyonal nga jeepneys sa sunod buwan apan hashasan pa kini base sa resulta sa ebalwasyon. Hinuon dili gihapon kini magdungan sa pagbiyahe  sanglit anam-anam lang ang pagbanhaw sa mga rota.

Sa higayon nga makabiyahe na sila sa kadalanan, kinahanglan gyud nga magul-og face shield ug face mask ang mga pasahero.

Sa wala pa ang pandemya , adunay 5,000 ka traditional PUJ’s ang nagdagan sa mga kadalanan sa siyudad.

Sa pagkakaron, 15 ka mga rota ang na gitan-aw nga posibleng balikan na og PUJs sumala pa ni Land Transportation Franchising and Regulatory-7 Regional Director Eduardo Montealto Jr., nga nahinabi sa Banat News.

Matud pa ni Montealto, ang Task Force nga gimugna sa Cebu City Government nakakita na og 15 ka rota nga agianan sa mga PUJ apan anamon lang kini pagabli. Matud niya kada semana adunay silay ablihang rota kung gikinahanglang pasudlan og PUJ.

Gipahibalo usab ni Montealto nga aduna silay ipahigayon nga one stop shop alang sa issuance ug special permits alang sa PUJ nga mobalik sa kadalanan.

Ang one stop shop langkoban sa Land Transportation Office Central Visayas, ug Cebu City Transportation Office nga sugdan karon nobyembre 3, 2020 sa may North Reclamation Area.  (BANAT NEWS)