BFP-7: Ayaw pasagdi ang kandila sa mga altar
CEBU, Philippines — Subay sa kalihukan sa adlaw sa mga santos ug kalag 2020 ang Bureau of Fire Protection 7 nilusad usab sa ilang programa nga Oplan Kaluluwa uban ang mga nagkadaiyang ahensya sa gobiyerno kini bisan paman og di pasudlan og tawo ang mga sam-ang tungod sa pandemiya. Matud pa ni SFO1 Wendel Villanueva, tigpamaba sa Cebu City Fire Department paghingusog kini sa kampanya sa kabomberohan nga malikayan sunog ning pagtimaan sa mga mahinungdanon kaayo nga adlaw.
Sumala pa ni Villanueva, base sa datos nga ilang nahipos ang kasagaran nga hinungdan sa sunog panahon sa pagobserbar sa kalagkalag mao ang dili mabantayan nga mga nangaupos nga kandila nga gipahinungod sa mga kalag sa mga tagbalay diha sa ilang mga altar.
Aron malikayan ang sunog aduna silay mga safety tips nga kinahanglan pagngon ang mga appliances kung wala na kini mga gamit, kinahanglan ipagawas sa mga panimalay ang mga butang nga dali ra kaayo masunog, sama sa gasolina, kerosene, pintal ug uban pa.
Sigurohon usab ang mga kandila nga gidagkotan layo sa mga kurtina, mga papel o karton ug dili angay ibutang sa mga plastic nga butanganan.
Gitug-an ni Villanueva, kung dili malikayan nga mobakasyon ang pamilya sulod sa pipila ka adlaw sigurohon nga ang mga LPG regulator, ug LPG hose anaa sa saktong kondisyon aron malikay ang paghungaw niini.
Malaumon ang kabomberohan taliwala niining pandemya nga nasinati sa panahon, kanunay unta nga mag-amping aron malikayan ang sunog. (BANAT NEWS)
- Latest