Cash aid sa mga medical workers gihatag na
CEBU, Philippines — Gisugdan na sa Cebu City Government ang paghatag og financial assistance sa mga private health workers kinsa mitabang aron batukan ang COVID-19, ingon man niatiman sa mga pasyente nga naigo sa maong virus.
Nalangay lang ang paghatag niini tungod kay duna may mga proseso nga angayan nga sundon.
Moabot sa dul-an 2 mil ka mga private health workers ang makadawat unya og insentibo nga P30, 000 alang kini sa buwan sa Agosto, Septiyembre ug Oktubre.
Siyam ka mga tambalanan ang hatagan og insentibo apan kagahapon giuna sa siyudad ang paghatag og P10, 000 nga ayuda sa mga health workers sa Cebu Doctor’s Hospital ug Chong Hua Hospital alang sa buwan sa Agosto.
Giila sa siyudad ang dakong tabang nga nahimo sa mga medical frontliners aron ang Cebu City makabangon gikan sa pagka epicenter of COVID-19 ngadto sa epicenter of recovery.
“Pasalamat ko ato gyud nahatag sa atong mga private medical frontliners what is given tag P10, 000 for the month of August, September and October because we value, we recognize their service exposing themselves naa gani uban nasakit, that is a gesture and of course a concern of the City Government so ato sila gitagaan og incentive”, sigon ni Mayor Labella.
Ang kadagkuan sa Cebu Doctor’s Hospital ingon man ang Chong Hua hospital nagpasalamat sa suporta nga gihatag sa siyudad nila nga mga frontliners nga matud pa maoy nakapasaka sa ilang moral aron mas mokugi sa ilang trabaho. Ang dakbayan giabagan sa Ramon Aboitiz Foundation Inc. (RAFI) aron pag-identify sa mga private health workers nga mahatagan og insentibo. /MEL (BANATNEWS)
- Latest
