Central Visayas adunay 32 ka ulahing kaso sa COVID-19

CEBU, Philippines — Adunay 32 ka kaso sa COVID-19 ang natala na usab sa Central Visayas base sa Oktubre 27, 2020 nga datos sa Department of Health (DOH)-7.

Sa mga bag-ong kaso 10 niini sa Cebu City, tulo sa Mandaue City ug 19 sa Probinsiya sa Sugbo.

Ang active cases sa Central Visayas anaa sa 872 samtang ang recoveries anaa sa 19,989 lakip niini ang 73 nga nadugang.

Samtang ang namatay anaa sa 1,338 gikan sa 22,199 nga cumulative total sa COVID-19 lukop rehiyon-7.

Nunot niini, nikabat ngadto sa 10,233 ang kinatibuk-ang kaso sa COVID-19 sa Cebu City diin 174 na lang ang active cases.

Ang siyudad adunay 9,380 nga kinatibuk-ang recoveries lakip na niini ang 30 nga ulahing nadugang ug nagpabalin sa 679 ang kinatibuk-ang namatay.

Ang Mandaue City adunay 2,551 nga kinatibuk-ang kaso diin 76 niini ang active cases lakip na niini ang tulo ka bag-ong kaso.

Ang siyudad adunay 2,315 nga kinatibuk-ang recoveries lakip niini ang usa nga bag-ong natala ug 160 ang kinatibuk-ang namatay.

Samtang sa Lapu-Lapu City adunay 2,457 nga kinatibuk-ang kaso ug walay bag-ong natala.

Ang siyudad adunay 2,231 nga kinatibuk-ang recoveries lakip niini ang ulahing tulo nga natala ug 103 ang kinatibuk-ang namatay. —Decemay P. Padilla/BDB (BANATNEWS)