Niñal: Kapin sa 1,000 ka PUJ kuwangan ra
CEBU, Philippines — Ang kapin sa 1,000 ka PUJ giingong dili makapaigo sa pag-accommodate sa tanang pasahero sa Dakbayan sa Sugbo.
Kini maoy gibutyag ni Clifford Niñal, usa sa mga sakop sa board sa Cebu Integrated Transport Service Multi-purpose Cooperative (CITRASCO).
Una na nga nipahibalo sa niaging adlaw ang kagamhanan sa Siyudad sa Sugbo nga makabalik na sa pagbiyahe sa sunod buwan ang 1,355 ka tradisyonal nga PUJ apan hashasan pa gyud kini ug depende sa resulta sa evaluation .
Matud ni Niñal nga ang kapin sa 1,000 ka units dili kini kapaigo tungod kay daghan kaayo og rota ang Dakbayan sa Sugbo.
Nasayran nga dunay kapin sa 5,000 ka PUJ ang nagdagan sa dakbayan sa wala pa ang pandemiya.
“Luoy intawn kaayo ang atong mga drayber, daghan gihapon ang dili maka-drive . Kuwang ra kaayo nang 1,000 kapin”, matud ni Niñal kinsa nagsilbi usab isip kapitan sa Barangay San Nicolas Proper.
Sugyot ni Niñal nga labing maayo nga wagtangon na lang ang mga bus nga temporaryong nagdagan karon diha sa nagkadaiyang rota sa siyudad.
Nanawagan karon ang sektor sa transportasyon sa Siyudad sa Sugbo nga unta mahatagan og patas nga gidaghanon ang PUJ operators kong ugaling makadagan na kini.
Gibutyag ni Niñal nga dunay ubang operators ang nipatimbang nalang sa uban nilang unit aron makasugakod sa kalisod. /BDB (BANATNEWS)
- Latest