P2.7 milyones shabu sakmit atol sa buy-bust

CEBU, Philippines — Nikabat ngadto sa P2.7 milyones ang balor sa drugas nga nasakmit atol sa gipahigayong buybust operation sa Station Drug Enforcement Unit (SDEU) sa Pardo Police Station nga gipangulohan ni Police Major John Kareen Escober niadtong Martes sa gabii diha sa Sitio Tabucanal, Barangay Pardo, Dakbayan sa Sugbo.

Ang mga suspetsado giila sa kapolisan nga sila si Romil Cordova Lim alyas "Omi", 38, target sa maong operasyon ug gikatahong high value individual ug anaa sa drug watch list sa regional level  ug Edgardo Dignadice Badayos alyas "Bogart" 63, residente sa maong dapit.

Matud ni Escober nga ang mga suspetsado maka-dispose kini og 100 gramos nga shabu matag semana.

Nasakmit sa kapolisan gikan sa mga suspetsado ang 400 gramos nga shabu nga  nibalor tanan ngadto sa P2.7 milyones .

Ang mga suspetsado natingkagol karon diha sa detention cell sa Pardo Police Station ug gikatakdang pasakaan og kasong  kasong kalapasan sa Section 5 ug Section 11 sa Article 2 sa Akta Republika  9165 kun “Comprehensive Dangerous Drugs Act of 2002. /BDB (BANATNEWS)