Pugante nahadlok maong mitahan

CEBU, Philippines — Nahadlok basin og mapareho sa kaubang piniriso nga nipuga nga napatay atol sa gipahigayong manhunt operation mi-surrender sa Police Station 4 ang ikatulong nieskapo nga si Nico Baylosis sayo kagahapon sa buntag.

Si Baylosis kauban nila ni Roberto “BadMax”Ludong ug Oliver Basak nga mieskapo sa Police  Station 4 niadtong Lunes sa kaadlawon atol sa kusog nga pagbunok sa uwan pinaagi sa paggabas ug pagbawog sa kabilya sa luyong bahin sa karsel.

Gilusad ang manhunt operation batok kanila hangtud nga natultolan silang Ludong ug Basak sa Sitio San Vicente sa Barangay Luz, silingang barangay sa Mabolo ug sakop pa gihapon sa maong presinto.

Si Basak nadakpan apan si Ludong napusilan patay sa kapulisan human matod pa suway nga misukol kanila pinaagi sa pagibot sa giluklok nga armas.

Mitug-an si Baylosis nga sa ilang balay lang sa Barangay Carreta siya nitago, natintal siya pagkuyog kay duna siyay mga problema.

Apan sa pagkapatay kang Ludong giangkon niyang nahadlok siyang maparehas niini mao nga nakadesider kining motahan.

Sumala pa niya nga nakahibawo ang ubang mga priso sa ilang gihimo nila apan gihulga sila ni Ludong. Si Ludong maoy “mayor-mayor” sa mga priso sa karsel sa Station 4 hinungdan nga wala magsaba ang uban.

Ang hepe sa Police Station 4 Police Major Dindo Juanito Alaras miingon nga human sa pageskapo giadto nila ang pamilya ni Baylosis aron kini kombinsiron sa pagtahan. Kagahapon sa buntag mibalik kanila si Baylosis.

Si Cebu City Police Office Director Colonel Josefino Ligan mimando karon sa mga station commanders sa pagpahigayon og greyhound operations sa ilang mga detention facilities ug inspeksyonon ang kalig-on sa estraktura aron di na masubli nga dunay makaeskapong detainees.

Bisan nabalik na si Baylosis ug Basak, padayonon gihapon ang imbestigasyon batok sa mga nag-duty nga mga polis nianang hitaboa. /IBM (BANATNEWS)