Christmas party sa empleyado sa Cebu City Hall gikanselar
CEBU, Philippines — Gikanselar ni Mayor Edgardo Labella ang Christmas party alang sa mga empleyado sa Cebu City Hall isip simpatiya sa mga tawo nga labing naapektohan ug lisod kaayo ang panginabuhi tungod sa pandemiya.
Matud ni Labella nga dili siya makaako nga maglipay-lipay sa party samtang ang uban naglisod.
Si Labella nagkanayon nga ang P5 milyones nga budget alang sa Christmas party iyaha na kining ipagamit alang sa pagpamalit og grocery items nga ipang-apod-apod ngadto sa ambulant vendors, mga drayber sa tradisyonal nga PUJ ug habal-habal drivers.
Matud usab ni Labella nga sa maong pamaagi maipatigbabaw ang diwa sa pasko ug ang pagtabang sa isigkatawo.
Giangkon ni Labella nga dili paigo ang P5 milyones hinungdan nga mangita siya og laing tinubdan aron madugangan kini ug daghan ang makadawat og grocery items. Samtang ang naandan nga P10,000 nga Christmas bonus matag empleyado sa city hall si Labella nagkanayon nga iya pa kining huna-hunaon. – Sanden J. Anadia/BDB
Labella ug mga tag-iya sa 83 ka establisamento nagtagbo
Nagtagbo kagahapon sila si Cebu City Mayor Edgar Labella ug ang tag-iya sa 83 ka establisamento nga nakabalda sa pipila ka sapa sa Dakbayan sa Sugbo.
Matud ni Labella nga atol sa maong tigom nipasalig ang building owners nga mohatag og kooperasyon sa paguba sa pipila ka bahin sa ilang edipisyo nga nakabalda sa mga sapa.
Giingong ang maong mga edipisyon karaan na kini ug natukod niadto pang 80’s ug 90’s.
Gipadayag ni Labella nga wala siya’y planong mobuhat og legal action batok sa mga tag-iya sa nahisgutang mga edipisyon tungod kay gipatigbabaw nila ang pagtinabangay.
Si Labella nag-umol kini og ad hoc committee nga modumala sa maong katuyoan.
Ang maong komitiba langkuban sa Cebu City Department of Engineering and Public Works (DEPW) ,Department of Public Works and Highways (DPWH), Cebu City Environment and Natural Resources Office ( CCENRO), Department of Environment and Natural Resources (DENR) ,Office of the Building Official (OBO) ug Prevention, Restoration, Order, Beautification, and Enhancement (PROBE).
Padayon usab pag-inspeksyon sa OBO ngadto sa mga establisamento ug kabalayan nga nahimutang kilid sa mga sapa. Decemay P. Padilla/BDB (BANATNEWS)
- Latest