CBDRP subling giaktibo; Upat ka durugista sikop

CEBU, Philippines — Gihingusgan  karon sa Cebu City Office of Substance Abuse Prevention (COSAP)  ang Community Base Drug Rehab Program  (CBDRP) sa 80 ka barangay sa Dakbayan sa Sugbo. Subling giaktibo sa COSAP ang mga barangay alang sa nagkadaiyang tigom kalabot niini.

Gihimamat usab sa COSAP ang Barangay Anti-Drug Abuse Council (BADAC).

Dihang nagsugod ang pandemiya temporaryong nahunong ang uban nila nga mga panagtigom apan karon nibalik na kini ug gipaniguro nila ang istrikto nga pagtuman sa health protocols. Si Jonah John Rodriguez, hepe sa COSAP nagkanayon nga importante kaayo ang CBDRP sanglit usa kini sa pamaagi nga magiyahan ang katawhan aron dili malambigit sa ilegal nga buhat. Kauban usab sa COSAP ang Philippine Drug Enforcement Agency ug uban pa nga mga ahensiya  sa lapad nila nga kampaniya batok sa ginadiling drugas.

Sa laing bahin, upat ka suspetsadong durugista ang nasikop atol sa gipahigayong buy bust operation sa Liloan Municipal Drug Enforcement Unit niadtong Sabado sa gabii diha sa Barangay Tayud, Lungsod sa Liloan.

Ang mga suspetsado mao sila si Rufino Anoos Jr, 48, minyo, walay trabaho ug taga Purok Mahogany,  Lohwie Quinapondan, 45, minyo, taga Purok Tagaytay Barangay Calero, Maricel  Guyha, dalaga, 36, taga Purok Mahogany, Barangay Tayud ug Mabhel Ybañez, dalaga, 49, residente  usab sa lugar.

Nasakmit gikan sa mga suspetsado ang lima ka gramong shabu nga nibalor tanan og P34 mil ug buy bust money. –Rowena D. Capistrano/BDB (BANATNEWS)