Mga kamot, tiil napalgan sa Mandaue City

CEBU, Philippines — Parte sa lawas sa tawo nga gituohang iya sa ‘chop-chop lady’ nga gisud og garbage bag nga napalgan sa sapa sa Mountain View, Sitio Kalubihan, Brgy.Talamban, Cebu City niadtong Sabado, napalgan sab diha sa Dakbayan sa Mandaue anang adlawa nianang pagka-gabii na.

Samtang duha ka mga banay ang niduol sa kapolisan sa Talamban ug nagpailang tagtungod sa biktima.

“Sa pagkakaron nag coordinate ta sa atong Mandaue City Police office kay sila sad naa sad silay nakaplagan nga other body parts, tiil ug ang kamot, so nag request na ta nga ma conduct og autopsy,” sigun pa ni Police Captain Jonathan Taneo, hepe sa Talamban Police Station.

Sumala pa ni Taneo kinahanglan nila nga ma- otopsiya ang lawas aron mahibal-an kung ang mga bahin sa lawas nga nakit-an sa Talamban ug sa Mandaue usa ra.

Sa Talamban, torso o lawas nalang gikan sa liog hangtud sa bilahan nga gisud sa garbage bag samtang usa ka parisan sa mga bukton ug bitiis ang nakit-an sa lugar sa Mandaue.

Kagahapon, (Domingo) gitug-an ni Taneo nga dunay duha ka pamilya nga niduol kanila  ug nipahibalo nga dunay sakop sa ilang pamilya nga na-missing ug buot nilang mahibaw-an kun mao ba kini ang napalgan.

“Naay niduol sa atoa nga family, mao sad na ang usa sa atong gi conduct-kan og interview para ma trace sad ang whereabouts sa kay duha ka family to ang niduol. I confirm lang sa nato at the same time mangayo ta og details sa family nga nawad-an,” sulti ni Taneo.

Lakip sa gisusi sa mga imbestigador ang mga marka sa lawas ug tattoo nga mahimong ilhanan sa mga pamilya. Wala pa hinuoy gibutyag nga dugang impormasyon si Taneo kun unsay backgrounds sa mga na-missing.

Si Taneo miingon nga wala nila gisalikway ang posibilidad nga ang biktima sa laing lugar gipatay ug gilabay lang sa maong dapit.

“Ato sad gitan-aw ang areas didto sa bridge sa ilawom,  didto sad sa sapa, kung naay nga CCTVs didto if didto gilabay, at the same gitan-aw sad kay basin sa ibabaw sad gilabay, kay ang ibabaw man sa sapa kay bukid, conducive jud kung maglabay kung ing-ana nga krimen kay mingaw man,”sumala ni Taneo.

Nagtuo si Taneo gituyo pagputol ang lawas sa biktima aron maglisod ang mga imbestigador pagila niini.

Aron mas mapadali ug sigurado ang pagila sa lawas nagtinguha silang mokuha og mga DNA samples sa namatay ug sa mga nangangkong tagtungod. /IBM (BANATNEWS)