Pagsilot sa magpataka og labay og basura angayan pahugtan

CEBU, Philippines — Nanghinaot ang pangu sa City Solid Waste Management Office (CSWMO) sa Dakbayan sa Talisay nga unta hingusgan ang pagpatuman sa ordinansa nga mosilot sa mga tawo nga magpataka og labay sa ilang basura.

Si Edwin Nierves nagkanayon nga sa iyang obserbasyon kasagaran mga basura ang usa sa mga hinungdan sa pagbaha sa siyudad.

Kini gumikan kay ang basura nga ilabay lang sa karsada adto mopaingon sa kanal ug mao kini ang maka stuck up nga maoy hinungdan sa pagbaha matag bunok sa uwan.

Ang partisipasyon sa opisyales sa matag barangay daku og matampo niini aron madisiplina ang ilang mga molupyo.

Si Nierves niingon nga usa sa mga aktibo sa maong ordinansa mao ang barangay Tabunok.

Nasayan matag bunok sa uwan pipila ka lugar sa Talisay ang mabahaan hinungdan nga kanunay usab moresponde ang mga sakop sa Aksyon Agad.

Si Gary Togonon, pangu sa AAT nihulagway nga basura ang nakabara sa agianan sa tubig hinungdan nga mosuyla gyud kini. /MEL (BANATNEWS)