4 barangay sa Olango, usa sa Lapu-Lapu hayan mahimong drug-free

CEBU, Philippines — Hayan madeklarar nga drug free ang upat ka barangay sa Isla sa Olango ug usa sa mainland sa Dakbayan sa Lapu-Lapu.

Kini nonot usab sa gipahigayon nga random drug test sa upat ka barangay nga gipasiugdahan sa City of Lapu-Lapu Office of Substance Abuse Prevention (CLOSAP).

Naglakip sa maong upat ka barangay sa Isla sa Olango mao ang Caw-oy, Tungasan, Baring ug Tingo ug usa sa mainland nga mao ang Barangay Maribago.

Ang nahisgutang upat ka barangay ang nakapasar sa initial requirements human ang 99 nila ka mga personnel ug opisyal ang nagnegatibo sa drug test.

Si Gary Lao nga maoy Executive Director sa CLOSAP miingon nga sa 112 ka mga personnel sa Barangay Maribago nga gipaubos sa drug test duha niini ang nagpositibo. Hinuon iyang gitataw nga ang resulta ipaubos pa sa confirmatory test.

Si Mayor Junard Ahong Chan miingon nga iyang itugyan ngadto sa mga opisyal sa barangay ang paghimo og lakang alang sa ilang mga personnel nga nagpositibo sa paggamit og ilegal nga drugas.

Samtang sa laing kalambuan tinguha sa kapolisan sa Dakbayan sa Talisay nga makig-alayon sa mga batan-on aron pagsumpo sa illegal nga drugas.

Si Police Major Gerard Ace Pelare, pangu sa Talisay City Police Station nakigtigum sa Local Youth Development Office aron hisgutan kung unsaon nila pag awhag sa kabatan-onan sa bag-ong normal.

Ang programa ilang himuon pinaagi sa online samtang ang mga batan-on naa kanunay mag atubang sa ilang mga gadget.

Lakip sa ilang idalit nga mga programa mao ang paghatag og impormasyon sa mga batan-on sa dili maayong epekto sa paggamit sa ginadiling drugas

Si Pelare niingon nga tipik kini sa ilang Oplan Limpyo Talisay nga ang tinguha mao ang pagdeklara sa mga barangay nga drug free. Gabriel C. Bonjoc, Rowena D. Capistrano/MEL (BANATNEWS)